По благословению Преосвященнейшего ПАРМЕНА епископа Чистопольского и Нижнекамского
Официальный сайт прихода - Местная Православная Религиозная Организация приход Свято-Авраамиевской церкви г. Болгар РТ Чистопольской Епархии Русской Православной Церкви (Московский Патриархат)

Богослужение святому мученику Авраамию Болгарскому

Богослужение святому мученику Авраамию Болгарскому
на малой вечерне

На Господи воззвах: стихиры, глас 1.

Подобен: О, дивное чудо:

О,  дивное, чудо!/ Просвещенный свыше,/ в Болгарстей стране / является христолюбивый Авраамий,/ проповедию о Христе / побеждает и посрамляет зловерныя,/ претерпев же от них многия муки,/ конечне мечем во главу усекается,/ и,тако сочетався Христу,/ молит спастися/ душам нашим.

О, велие дарование граду Владимиру!/ аки богатствоНебесное/ принесошася в онь из страны Болгарския/ нетленныя мощи святаго мученика Авраамия/ на облегчения всяких скорбей/ и исциления болезней,/ на отгнания мглы страстей,/ комуждо в приключившихся печалех на утешение/на Небеси молиши Христа Бога/спастися душам нашим. 

О, неизреченная премудрость Божия!/ Ихже предустави Бог, тех и призва, сих и оправда;/а ихже оправда,сих и прослави;/ на тебе,мучениче,сбысться сие слово апостола./Видя Господь, яко избран еси сосуд/ и Сына Божия Христа проповедал еси,/ претерпев за Него муки,/ сотвори тя славна чудесы,/ Яже показуеши всем, чтущим любовию святую память твою./ Темже молися, Страстотерпче,/ спастися душам нашим.

Слава, глас тойже:

Ныне наста память мученика Авраамия: / сего ради, верни, сошедшееся, / с верою и любовию восхвалим его песньми и возопием ему: / радуйся, всем страстотерпцем сопричастниче / и исповедниче Христов Авраамие, / яко венец нетленный приял еси на версе твоем, всечестне. / Радуйся, яко ныне водворяешися с мученическими лики, / Света невечерняго сподобляемь. / Радуйся, яко Троице предстоиши со Ангелы, / Юже непрестанно моли / спастися душам нашим.

И ныне, Богородичен, глас тойже:

Небесных чинов радование, / на земли человеков крепкое предстательство, / Пречистая Дево, спаси ны, / иже к Тебе прибегающия: / яко на Тя  упование по Бозе, Богородице, возложихом. 

На стиховне стихиры, глас 2:

Дом правыя веры был еси, мучениче Авраамие, / еюже исповедав Христа и мучителей посрамив, / венец нетленный приял еси на Небеси, идеже моли, мучениче, / даровати душам нашим велию милость

Стих: Возвеселится праведник о Господе / и уповает на Него.

Дом мужества и крепости явился еси, / страдальче и мучениче Авраамие! / Истинную веру пред враги проповедал еси, / угасив зловерие излиянием крове твоея, / никакоже во уме твоем мысля отрещися Христа Бога, / Емуже молися / даровати душам нашим велию милость.

Стих: Насаждени в дому Господни, / дому Бога нашего процветут.

Дом твердаго исповедания Христовы веры / явился еси, страстотерпче Авраамие, / многообразныя мучения претерпел еси, / железом уязвляемь, огнем распаляемь и мечем скончаваемь, / непреклонен пребыл еси во исповедании Христа Бога, / Егоже моли / даровати душам нашим велию милость.

Слава, глас 6:

Днесь светло празднуем священную память / мученика и чудотворца Авраамия, / проповедав бо Христа, / прият от мучителей смерть неповинную / и ныне водворяется с лики мучеников, / поя и славословля Господа, / Егоже молит даровати душам нашим велию милость.

И ныне, Богородичен, глас тойже:

Богородице, Ты еси лоза истинная, / возрастившая нам Плод живота. / Тебе молимся, молися, Владычице, / со Авраамием мучеником и со всеми святыми, / помиловати души наша.

Тропарь писан на велицей вечерни.

на велицей вечерни

На Господи воззвах: стихиры, глас 2.

Пдобен: Киими похвальными.

Киими духовными песньми / восхвалим мученика и чудотворца Авраамия, / всем мирным теплаго заступника, / земли Российстей удобрение / и верою лобызающим честныя мощи его – твердое ограждение, /его же ради молитв Христос Бог / дарует нам велию милость.

Киими благоговейными усты / воспоим Авраамия, Христова страстотерпца, / течение совершивша благочестно, / молитвами своими устрояюща вся благая душам и телесем нашим / от Вседержительныя руки Христа Бога, / имеющаго множество щедрот и велию милость.

Киими похвальными венцы / почтим преславнаго страстотерпца Авраамия, / предстоит бо Престолу Владыки Христа Бога нашего, / велию благодать от Него прием, / всем притекающим с верою точит цельбы от мощей своих / и умоляет Христа Бога / даровати всем мир и велию милость.

Слава, глас 8:

Придите, благовернии людие, / восхвалим великаго страстотерпца и чудотворца Авраамия, / иже пострада Христа ради / и живот свой за Него положи, / и ныне пребывает у Него в Горних селениих, / и праведною своею душею, яко солнце, сияет, / на земли же чудесы своими, / аки лучами света, всех осиявает: / честные бо его мощи, / аки многоцелебный источник, / подают всем, с верою притекающим, благодать и исцеление. / Темже молим его испросити нам у Христа Бога / спасение и велию милость.

И ныне, Богородичен.

Вход. Прокимен дне. Ичтения.

Пророчества Исаиина чтение (глава 43):

Тако глаголет Господь: / вси языцы собрашася вкупе, / и соберутся князи от них. / Кто возвестит сия в них? / Или яже от начала, кто слышана сотворит вам? / Да приведут свидетели своя и оправдятся, и да услышат, и да рекут истину. / Будите Ми свидетели, / и Аз Свидетель, - глаголет Господь Бог,- / и Отрок Мой, Егоже избрах. / Да познаете и веруете Ми, и уразумеете, яко Аз есмь; / прежде Мене не бысть ин бог и по Мне не будет. / Аз есмь Бог, и несть, разве Мене, спасаяй. / Аз возвестих и спасох, уничижих  и не бе в вас чуждий. / Вы Мне свидетели, и Аз Господь Бог. / И еще от начала Аз есмь, / и несть от рук Моих избавляяй. / Сотворю, и кто отвратит то? / Сице глаголет Господь Бог, / избавляяй  вас Святый Израилев.

Премудрости Соломоновы чтение (глава 3):  

Праведных души в руце Божией, / и не прикоснется их мука. / Непщевани быша во очесех безумных умрети, / и вменися озлобление исход их. / И еже от нас шествие сокрушение, / они же суть в мире. / Ибо пред лицем человеческим аще и муку примут, / упование их бессмертия исполнено. / И вмале наказани бывше, великими благодетельствовани будут, / яко Бог искуси я и обрете их достойны Себе. / Яко злато в горниле, искуси их, / и, яко всеплодие жертвенное, прият я. / И во время посещения их возсияют / и, яко искры по стеблию, потекут: / судят языком и обладают людьми, / и воцарится Господь в них во веки. / Надеющиися Нань разумеют истину / и верни в любви пребудут Ему, / яко благодать и милость в преподобных Его / и посещение во избранных Его.

Премудрости Соломоновы чтение (глава 4):

Праведник, аще постигнет скончатися, в покои будет. / Старость бо честна не многолетна, / ниже в числе лет исчитается. / Седина же есть мудрость человеком / и возраст старости – житие нескверно. / Благоугоден Богови быв, возлюблен бысть / и живый посреде грешник преставлен бысть. /  Восхищен бысть, да не злоба изменит разума его, / или лесть прельстит душу его. / Рачение бо злобы помрачает добрая, / и парение похоти пременяет ум незлобив. / Скончався в мале, исполни лета долга, / угодна бо бе Господу душа его, / сего ради потщайся от среды лукавствия. / Людие же видевше и не разумевше, / ниже положивше в помышлении таковое, / яко благодать и милость в преподобных Его.

На литии стихиры, глас 3:

Приидите, мучениколюбцы вси,/ песньми и псалмы духовными возблагодарим Христа Бога нашего,/ даровавшего нам мученика и чудотворца Авраамия,/ иже с веселием претерпе казни лютых мучителей/ за Христа Бога нашего,/ от Негоже подвигов почесть прия,/ и ныне в вечных селениих с лики мученик/ просит очищения душам нашим/ и велия милости.  

Приидите, правовернии,/ добляго мученика Авраамия/ священное торжество совершим днесь:/ любве бо ради Христовы/ красная мира сего вся презре/ и вдася мучителем на мучение, не убоявся мук,/ и на Небеса востекл взирати/  доброту неизреченную Спаса нашего,/ Егоже просит помиловатися душам нашим.

Придите вси, возрадуемся днесь Господеви/ в память страстотерпца Авраамия:/ егда бо пренесения честных его мощей бяше в град Владимир,/ тогда великий князь Георгий со князи и святители/ стретоша их с велиею радостию,/ людие же, зряше многострадальное и нетленное твое тело,/ со слезами вопияху:/ о страстотерпче! Кое благохваление/ честному твоему пренесению сотворим?/ Недоумеем и удивляемся твоему милосердию,/ еже на нас показал еси;/ страстотерпче убо Авраамие,/ сохрани молитвами твоими и вся,/ славящия святыя подвиги твоя,/ и пребуде выну молитвенником/ о спасении душ наших.

Слава, глас 5:

Днесь красуется град Владимир/ Божественным сокровищем мощей твоих,/ обитель твоя, ликоствующи, радуется,/ и православнии твоими чудесы, мучениче Авраамие, хвалются,/ ты же моли Христа Бога нашего/ даровати нам велию милость.

И ныне, Богородичен.  

На стиховне стихиры, глас 8.

Поминаим, братие,/ страстотерпца Христова Авраамия/ и подражаим твердой вере его,/ многострадальное его тело/ облекший в нетление,/ преднаписующи образ общаго воскресения.

Стих: Праведник, яко финикс, процветет,/ яко кедр, иже в Ливане, умножится.

Велие Божие дарование тебе,/ мучениче Авраамие,/ всю бо крепость мучителей победил еси,/ и приял еси нетленный венец от руки Вседержителя,/ на земли сияеши многими чудесы,/ на Небеси предстоиши Царю и Владыце/ и молиши Его всем нам даровати/ мир и велию милость. 

Стих: Хранит Господь вся кости их,/ и ни едина от них сокрушится. 

Притецем, братие,/ к раце мощей страстотерпца Авраамия/ и подивимся, како хранит Господь/ вся кости избранных Своих/ и ни едина от них сокрушится./ Темже убо верою и любовию/ прославим Христа Бога,/ подающяго нам мир и велию милость.

Слава, глас 6 :

Cрадуйтеся нам, российстии собори, днесь/ в светлой памяти страстотерпца Авраамия,/ подающаго от нетленного сокровища мощей своих/ благоухание Святаго Духа./ Темже убо сошедшеся, общий лик тому составим,/ песньми Божественными зовущее:/ поминай ны, мучениче,/ и за ны Христу молися,/ даровати нам милость в День судный.

И ныне, Богородичен: Творец и Избавитель:

Тропарь, глас 4:

Днесь, благовернии людие, сошедшеся, восхвалим добляго сего мученика и страдальца Авраамия,/ сей бо, укрепляем силою Божиею,/ душу свою положи за Христа,/ много пострадав от зловерных болгар./ Сего ради от Господа венец прият/ и ныне предстоит Ему и молится о граде сем / и о всех нас/ чтущих память его. 

Слава, и ныне, Богородичен.

на утрени

На Бог Господь: тропарь святого дважды. Слава, и ныне, Богородичен.

По 1-м стихословии  седален, глас 1:

Светлый и всепразднственный твой день, мучениче Авраамие, / созывает нас духовно праздновати, / и честныя мощи твоя усердно почитати, / и славити единаго Бога в Троице. / Темже псаломски вопием ти: / возвеселится праведник о Господе и уповает на Него.

Слава, и ныне, Богородичен:

Упование христиан, Пресвятая Дево, / Егоже родила еси Бога паче ума и слова, / непрестанно моли с вышними силами / дати оставление грехов наших, исправление жития / верою и любовию присно славящих Тя.

По 2-м стихословии седален, глас 4:

Кровь твою, яко алавастр мира, / Христови принесл еси, мучениче Авраамие. / Темже преблагий и великий Дарователь Бог / прослави тя и возвыси чудесы Своими богатыми, / сего ради память твою с верою почитаем, досточудне.

Слава, и ныне, Богородичен:

Дево Всенепорочная, Всещедраго Бога рождшая, / Того моли непрестанно оставление согрешений наших даровати / и прежде конца покаяние / верою и любовию почитающим Тя, Всепетая.

По полиелеи седален, глас 8:

От младенчества душею к Богу прилепился еси, мучениче Авраамие, / сего ради венцем мученическим от Христа увязеся, Небесныя дары приемлеши, имиже подаеши от всех недуг здравие / приходящим к тебе  верою / и любовию чтущим святую память твою.

Слава, и ныне,

Богородичен:

Яко Деву в женах, без семене рождшую Бога плотию, / вси блажим, роди человечестии, / Огнь бо вселися в Тя Божественный, / и яко Младенца доиши Зиждителя и Господа. / Темже Ангельстии собори и человечестии роди достойно славят пресвятое рождество Твое, и мы согласно вопием Ти: / моли Христа Бога согрешений оставление даровати  / воспевающим достойно память Твою.

Таже степенна, 1-й антифон 4-го гласа. Прокимен, глас 4: Возвеселися праведник о Господе / и уповает на Него. Стих: Услыши, Боже, глас мой, внегда молитимися к Тебе. Всякое дыхание: Евангелие от Матфея, зачало 36.

По 50-м псалме, стихира,

глас 6:

Измлада предъизбра тя Господь / в Небесное селение, мучениче Авраамие, / и от Вседержительныя Его десницы / нетленный венец на версе твоем положися, /и осиян еси от Него Божественным светом, / и выну насыщаешися от таковыя радости и веселися, / и молиши за вся людии живущия в Православии / и честныя твоя мощи верно почитающия и вопиющия: / слава Богу, сотворшему дивная Своя чудеса.

Канон, глас 4.

Песнь 1

Ирмос: Моря чермную пучину / невлажными стопами / древний пешешествовав  Израиль, / крестообразныма Моисеовыма рукама / Амаликову силу в пустыни победил есть.

Неисчестне в милости, Христе Спасе мира, / вразуми нас, недостойных празднственно совершити память страдальца Твоего. / Ты же, страстотерпче, подаждь нам разум чист вся житейская презрети / и единаго на потребу спасения искати.

Превечный Бог дарова тебе силу / вражия возношения сокрушити и вся муки претерпети, / ты же нам, грешным, подаждь разум похвальная тебе принести / и молися за всех, тя восхваляющих.

Богомудре страстотерпче Христов Авраамие, / не возгнушайся нас, грехами оскверненных, / и не отрини сего тебе от нас малаго хваления, / но прими сие о всех, воспевающих тя, Господу молися, / да вси память твою, радующееся, празднуем.

Богородичен: Яви милосердие Твое, Госпоже Пречистая, на ны недостойныя, / яко к Тебе прибегаем с плачем сердечным и вопием: / помилуй нас, Едина всех грешных спасение.

Песнь 3   

Ирмос: Веселится о Тебе Церковь Твоя, Христе, зовущи: / Ты моя крепость, Господи, / и прибежище, и утверждение.

Наста честная память твоя, страстотерпче Авраамие, / в нейже, ликующе, воспеваем тя и лобызаем честныя мощи твоя, / всяких дарований духовных нас сподобляющая.

От честных мощей твоих многое исцеление источаеши, мучениче, / и град, в немже хранится нетленное тело твое, / от всяких бед покрываеши, / сего ради любовию память твою, страстотерпче, празднуем.           

Несущии мощи твоея от  Болгарския страны во град Владимир / не знаяху тяготы ни нощию, ни днем. / Мы же ныне, точию окрест раки твоея стояще, молим тя: /сохраняй чтущия память твою от всяких бед.

Богородичен: Сущие во гресех мнозех, к Тебе вопием, Всепречистая: / очисти ны Твоим милосердием, да не погибнем до конца, / Ты бо всех скверн Очистителя родила еси.

Ин кондак, глас 3:

Укрепився, славне, любовию Господнею / и Того честный Крест на рамо взем, иго Господне, / посрамил еси даже до смерти, / и сего ради, досточудне, явися страдалец велик, Авраамие, / и оружником храбротаинник / и участник Божия благодати.

Седален, глас 4:

Днесь светло празднуется память твоя, мучениче Авраамие: / возбуждаеши бо всех к веселию чудесы твоими / и непрестанными о нас к Богу молитвами.

Песнь 4

Ирмос: Вознесена Тя видевши Церковь на Кресте, / Солнце Праведное, /ста в чине своем, / достойно взывающи: /слава силе Твоей, Господи.    

Христово благоухание явился еси, мучениче, / в спасаемых тобою от недугов душевных же и телесных, / темже вси правовернии славят Господа, / Его же ради от зловерных болгар пострадал еси.

Мощи твоя, мучениче, / утверждают обитателей страны сея в вере и благочестии; /темже и мы с любовию вопием ти: / радуйся, страстотерпче и чудотворче Авраамие.

Покровителя жизни нашея и молитвенника к Богу / почитаем тя, страстотерпче Авраамие: / на стезю нас покаяния направи, / мучеников сопричастниче, Ангелов согражданине преславне.

Богородичен: Како приступим к Тебе, Херувим и Серафим честнейшей, / и како воззрим на Тя, обременении грехи многими? / Но, о Пречистая Владычице, / Сама очисти ны и вечныя муки избави.

Песнь 5

Ирмос: Ты, Господи, мой свет, / в мир пришел еси, / Свет Святый, обращаяй из мрачна неведения / верою воспевающия Тя.

По пренесении святых мощей твоих во град Владимир, мучениче Авраамие, / великий князь Георгий с подружием своим и чады и вси обитатели града / память твою усердно всегда творяху, / знающе тя на Небесех Христу предстояща / и непрестанно покрывающа почитающих тя, / ихже и ныне сохраняй от всех бед.

Пламень угаси наших плотских обуреваний и нечистых наших помышлений, / да пламене геенскаго огня твоими молитвами, Авраамие, избавимся. 

Душу и помышление к тебе простираем, страстотерпче Авраамие: / согрей наше сердце любовию, яже к Богу, / да закону Его усердно последующее,  прейдем поприще нашего жития непреткновенно.

Богородичен: Бога родила еси Ты, Пречистая, восхотевшаго спасти грешники, / к Немуже имаши всегда многое дерзновение, яко Мати: / молися о нас Ему, / любовию воспевающих Тя, Владычице.

Песнь 6

Ирмос: Пожру Ти гласом хваления, Господи, / Церковь вопиет Ти, / от бесовския крове очищшися / ради милости от ребр Твоих / истекшею Кровию.

Видя тя исконный враг, многия добродетели на земли творяща, / зловерных болгар подвиже на тя, / да приобщишися скверней вере их, / ты же кровию запечатлел еси правую веру твою / и сице Небесное Царствие восприял еси.

Пречестное тело твое, страстотерпче Авраамие, / обогащает всех не земным и тленным богатством, но Небесным, / егоже кровию достигл еси, / темже и нас получити то сподоби, любовию воспевающих тя.

Омывся кровию, яко водою, / и всех мучителей ужасив крепким твоим за Христа страданием, / ныне на Небеси ликуеши / и тамо за всех верных неусыпно молишися, / да твердо содержат Православную веру.

Богородичен: Соблюди христианское жительство, Богородице, грешных к покаянию обрати, / чисты вся постави пред Сыном Твоим, Пренепорочная Дево, и сподоби нас молитвами Твоими Небеснаго Царствия.

Кондак, глас 8:

Яко многоценное сокровище, / принесено бысть от Болгарския страны во град Владимир / пречестное тело твое, мучениче Авраамие, / имже подаеши всем чтущим преславную память твою, обилие исцелений, / предстоя на Небеси Христу Богу / и моля Его о спасении душ наших.

Икос:

Яко пресветлая звезда, в Болгарстей земли возсиял еси / благими твоими деянии и апостольскою проповедию, страстотерпче Авраамие, / и тамо же мучен был еси за Христа. / Ныне же чудесы, яко светлыми лучами, сияеши, / болящим исцеление подаеши, здравствующим же радование и веселие. / Темже днесь сошедшееся, верно зовем ти: / радуйся, избранниче Господень, / всея Российския земли заступниче и всем христианином помощниче.

Песнь 7

Ирмос: В пещи Авраамстии отроцы персидстей, / любовию благочестия паче, / нежели пламенем, опаляеми, взываху: / благословен еси в храме славыТвоея, Господи.

Вся наша земля возрадовася, / зрящи тя, от всех верных сретаема / и благодарными гласы, аки мусикийскими трубами, восхваляема, / и днесь радуется, с нами ликующи и память твою прославляющи.

Крепость и исцеление приимаху от тебе, мучениче Авраамие, немощствующии плотию, / скорбнии же духом и удручении печальми житейскими / обретаху душевное утешение в умиленнем призывании святаго имени твоего, / прославляющее дивнаго во святых Своих Христа Бога нашего.

Веселися, Богоспасаемый граде Владимире, / и наслаждайтеся, вси вернии, Христова благоухания / от святых мощей страстотерпца Авраамия, / яже не токмо телесныя болезни исцелевают, / но и душевныя страсти вся врачуют.

Богородичен: Ум наш плени в послушание веры, / дух и душу всесовершенны соблюди / и тело в пришествие Господа нашего Иисуса Христа непорочно сохрани / молитвами Твоими, Богородительнице.

Песнь 8

Ирмос: Руце распростер, Даниил / львов зияния в рове затче; / огненную же силу угасиша, / добродетелию препоясавшееся, / благочестия рачители, отроцы, взывающее: / благословите, вся дела Господня, Господа.

Силою Божиею укрепляем, отразил еси советы беззаконных, / иже руце твоя и нозе нещадно отсекаху. / Темже и главу преклонь под мечь, вопиял еси: / благословите, вся дела Господня, Господа.

Устрашити тя не возмогоша невернии, / ниже поколебати твердаго ума твоего отрещися Христа, / яко адамант, пребыл еси крепостию веры твоея, поя непрестанно: / благословите вся дела Господня, Господа.

Придите, вси правовернии, / воспрославим память страстотерпца Авраамия / и облобызаем с верою честныя мощи его, / источающия цельбы недугов душевных и телесных всем воспевающим: / благословите, вся дела Господня, Господа.

Богородичен: Победи, Пречистая, враги видимыя и невидимыя, / низложи на нас тщащихся, / и страстей нас всяких избави, да поем торжественнее: / благословите, вся дела Господня, Господа.

Песнь 9

Ирмос: Камень нерукосечный / от несекомыя горы, Тебе, Дево, / краеугольный отсечеся, / Христос, совокупивый разстоящаяся естества. /  Тем, веселящееся, Тя, Богородице, величаем.

Велия слава ты еси наша и похвала, / страстотерпче Христов Авраамие: / велику бо веру во Христа Иисуса имея, / второе крестился еси в Него кровию твоею / и достигл еси Небеснаго жития, / егоже улучити сподоби и нас молитвами твоими.

Псалмы и песньми восхваляем тя, мучениче, / озаряеши бо нас всегда чудесы твоими, / ихже кто доволен исчести, разве Давый тебе сия? / Емуже молися, да спасет вся люди, / с верою и любовию совершающия святую память твою.

Воистину никтоже, притекаяй к тебе, мучениче Христов Авраамие, / тощь благодати твоея отходит, / еяже и нас исполнити, молимся.

Богородичен: Воистину истинаго Бога плотию, Богородице, родила еси, / Егоже милостива нам вдень суда соделай, / да безконечно с Ним Тя величаем.

Светилен:

Света немерцающаго достигл еси, мучениче Авраамие, / за крепкое твое страдание Христовы ради веры от зловерных, / и ныне, пребывая во Царствии Небеснем, / радуешися и веселишися со всеми мученическими лики. / Моли о нас, чтущих святую память твою.

Слава, и ныне, Богородичен:

Свет нам возсия пресветлый от Твоея девственныя утробы, / Христос Бог наш, Пречистая  Владычице, / темже Тя молим, Царицу и Богородицу: / моли Сына Твоего и Бога нашего, / да, простив нам согрешения наша, / спасет нас, яко Благ и Человеколюбец.

На хвалитех стихиры, глас 1:

Веселися и торжествуй, граде Владимире, / имея в себе мощи мученика и чудотворца Авраамия, / иже днесь предстоит Невечернему Свету, / зрит неизреченную Его доброту / и присно молит / даровати душам нашим мир и велию милость.

Красуйся и ликуй, обитель Божия Матере, / торжествуйте, вси правовернии, / зрящее честныя мощи мученика и чудотворца Авраамия, / источающия исцеления всем, / притекающим к ним с верою и воспевающим Христа, / подающего всем мир и велию милость.

Радуются чини ангельстии и святых лики / и веселятся зрящее праведную душу, возносиму на Небо, / и преставляему к Божественному Престолу, / и сочетаваему с лики мучеников, / с нимиже и молися Христу / даровати душам нашим мир и велию милость.

Слава, глас 8:

Кто не воспоет днесь торжество / святаго мученика и чудотворца Авраамия, / правыя веры ревнителя / и зловерных посрамителя: / той бо, мученическою кровию вшед в светлый Христов чертог, / аки светлолучными зарядами, / просвещает нас благотворными чудесы своими / и молит Христа Бога о всех, / верою и любовию совершающих память страстотерпца.

И ныне, Богородичен, глас тойже:

Владычице, прими молитвы раб Твоих / и избави нас / от всякия нужды и печали.

На Литургии служба мученическая.

Присоединиться к молитве по соглашению
Присоединись к молитве по соглашению! Попроси маленького счастья ради счастья большого, которое только Господь может явить.
Помощь храму

Пройдут года, пронесутся столетия, забудутся не только наши имена, но и могилы, исчезнет всякая память о нас в потоке веков и поколений. Если во дни земной жизни мы будем отверзать руку свою посильному благодеянию храмам Божиим и вкладывать частицу доброго делания, то сам Господь воздаст каждому в жизни вечной!

Для реализации и осуществления работы каждой из служб нашего прихода тратятся немалые средства. В связи с этим будем сердечно благодарны каждому, кто поможет храму, и вложит свою лепту во славу Божию!